کئچل داغا سلام اولسون

نویسنده : محمد نژادمحمد | تاریخ : 11:44 قبل از ظهر - چهارشنبه 25 خرداد 1390

کچل داغ  و غاری که در دل کوه قرار گرفته

کئچل داغا سلام:

1-آذری دیل شیرین گُؤزَل بیردیلدی   **  شَهریار شِعرینین دادین بیلدیردی[1]

حیدر بابا یازیب جانا سیندیردی ** کئچل داغی اُو سَبکیده یازمیشام

                        فکر اِئتمیون دوز یولومدان آزمیشام

2- آذربایجان ایرانیمین باشیدی ** ایران اُولسا اوزوک اُودا قاشیدی

غَم گُونـونـون وَفالی قارداشیدی ** آذربایجان جَماعتی اُویاقدی

چَتینلیکده بیر بیرنه دایاقدی

3- شهریارین عزتی وار مَقامی ** بالدان شیرین سؤزلری وار کلامی

اِبلاغ اُولوب هاممیلارا سلامی ** ((سلام اُولسون شؤکَتیزه اِئلیزَه ** مَنیم دَه بیر آدم گَلسین دیلیزَه))

4- شهریار حافظ دَن اِلهام آلیبدیر ** بودور عِلت جاودانه قالیبدیر

دنیالارا آوازه سین سالیبدیر** شهریار دان مَن دَه اِلهام آلمیشام

آمما بیلون چوخ دالییا قالمیشام[2]

5- آذربایجان ماهالیندا هَشترود ** سَرسَکَتدَه[3] سَکـكیزدنه واردی رود[4]

سلام اُولسون ایل لَرینه،هم درود ** جانیم قربان هشترودون آدینا

بیر گون اُولار من دوشَرَم یادینا

6- آقبلاخدی هشترودون گؤزَلی ** همتی وار آباد اُولار دوزلی

مَزَه لیدیر ،مَزَه لیدیر،مَزَه لی  ** اوزاقدایام گؤزوم قالیب داغیندا

دَرَه سینده، تَپَه سینده ، باغیندا

7- آقبلاغین کِئچل آدلی داغی وار  ** کِئچل داغن دوره سینده باغی وار

اینَـیـی وار، قُویــونو وار ،یاغی وار  ** هِئچ سو چاتماز بولاغینـین سویونا[5]

ناخُوش  اُولماز هَرکَس اُوردا یویونا

8- کِئچَل  داغا آلله کُؤیول قازیبدیر[6] ** چُوخ گَزَنلَر گَلیب اُوردا آزیبدیر

مَنیم بابام اُونا سوزلَر یازیبدیر ** گویلوم ایستَر هاممی گَله گؤروشَه

یاواش یاواش کِئچَل داغا سوروشه[7]

9- حیدر بابا! کِئچَل داغا باخ گینان[8]  ** ایلدیریملار! کِئچَل داغا شاخ گینان

سِئللَر ،سولار! شاقلدایب آخ گینان  ** سلام اُولسون کِئچَل داغین آدینا

بیرگون اُولار مَنی سالار یادینا

10- حیدر بابا ! کِئچَل داغیم قوجالیب  ** شانلی آدی دونیـالارا اوجالیب

سُوروش گینان کیملَر اُؤلوب کیم قالیب  ** کِئچَل داغیم هَر نه وِئرسه قالیبدیر

محبتی اُورکَلَرَه سالیبدیر

11- کِئچَل داغا مَنده سلام دِئیَرَم[9]  ** کِئچَل داغین بال کره سین یئیرم

قیش گونونده یون جورابیـن گئـیَرَم  ** حیدر بابا کِئچَل داغا دایاخدی

بو داغلارین ایگیت لَری اُویاقدی

12- اوجالدارام کِئچَل داغین آدینی  ** جلالینی شوکَتـیـنی یادینی

دادیـزدیـررام آغیزلارا  دادینی  ** آقبلاخدان یازماغا چُوخ سوزم وار

کِئچَل داغین کؤیـولونده گؤزوم وار

13- آی کِئچَل داغ جاوانلارون یاتماسین[10]  ** یاخـشیـلیـغی یامانلیغا قاتماسین

تازه گَلین قَئین آنانی  آتماسین  ** آدام اُولَر یاخشی پیسدَن آد قالار

آجیـلیـقدان شیرینـلیکدن داد قالار

14- یاغیش یاغار کِئچَل داغی ایسلادار  ** دولو توشر حاصیلاری کاسلادار [11]

حاصل سولسا کتدیلری سوسلادار  ** الله !گؤروم درد و بلا اُولماسین

گول چیچَکلَر سارالماسین سولماسین

15- کِئچَل داغین آغ داشلاری قره سی  ** دَرَه لَری تَپَه لَری سره سی

چوخ گؤزلدیر کَهلیکلَری فره سی  ** آی کِئچَل داغ! سنون اوزون  آغ اولسین

قو جالارین جوانلارین ساغ اولسین

قو جالارین جوانلارین ساغ اولسین




دسته بندی : امکانات و مشکلات , فرهنگ (آداب و روسوم ) , غار آقبلاغ،گردشگری و توریست ,
 

آخرین مطالب

 
 
شبکه اجتماعی فارسی کلوب | Buy Website Traffic | Buy Targeted Website Traffic